У Віцебску плануюць адкрыць беларускамоўную школу
Общество
Опубликовано: 16:00, 19.04.2018
412
0

Начальнік упраўлення адукацыі аблвыканкама Дзмітрый Хома паведаміў «Віцебскай вясне», што кіраўніцтва вобласці падтрымала ідэю стварэння ў горадзе школы з беларускай мовай навучання. Але дзе і калі яна будзе адчыненая — пакуль невядома.

Нагадаем, у Віцебску няма не тое што беларускамоўнай школы альбо гімназіі — нават беларускамоўнага класа. У лютым 2018 года абласная філія ТБМ («Таварыства беларускай мовы») паспрабавала сабраць звесткі аб бацьках, якія б жадалі навучаць сваіх дзяцей у Віцебску па-беларуску. На просьбу даслаць у філію кантактную інфармацыю адгукнуліся толькі тры сям'і.

— На жаль, у 2018 годзе беларускі клас, найхутчэй, не будзе адкрыты. У аблвыканкаме мне адказалі, што калі б назбіралася хаця б з 15 заяваў ад бацькоў, была б іншая справа… Але запэўніваюць, што ў 2019−2020 навучальным годзе клас з’явіцца абавязкова. Больш за тое, гаворка ідзе пра стварэнне цалкам беларускамоўнай школы, менавіта з азначанага перыяду. Абяцаюць пачаць падрыхтоўчую працу ўжо цяпер, — паведаміў старшыня абласной арганізацыі ТБМ Юрый Бабіч.

Дзмітрый Хома: «Трэба працаваць разам»

Начальнік упраўлення адукацыі аблвыканкама Дзмітрый Хома пацвердзіў, што такая «ідэя сапраўды апрацоўваецца»: «І гэтая ідэя ні ў якім разе не выклікае ў нас непрымання. Наадварот, у нас ёсць разуменне, што гэта трэба рабіць. Але нам трэба працаваць разам».

Хома расказаў, што меў на гэты конт размову з кіраўніцтвам вобласці, і яно падтрымала ідэю стварэння ў Віцебску беларускамоўнай школы.

— Але пакуль што не хочацца называць нейкія канкрэтныя даты, — адзначыў Дзмітрый Хома.

«Выбіраем сярод невялікіх школ»

Такім чынам, праект знаходзіцца пакуль на стадыі «апрацоўкі ідэі». Па словах Хомы, ёсць шмат арганізацыйных момантаў, якія патрабуюць пільнай увагі і працы. Сярод іх, напрыклад, пытанне выбару школы: «Мы ўжо прыглядаем яе, але гэта не будзе школа ў Білева ці на Маскоўскім праспекце, дзе вучыцца больш за паўтары тысячы вучняў. Выбіраем сярод невялікіх школ».

Не выпрацаваны яшчэ і механізм функцыянавання ўстановы. Ці ствараць там адразу па адным беларускамоўным класе на кожнай паралелі (ад 1-га да 11-га), ці пачынаць з аднаго першага класа і павольна, цягам 10 гадоў, пераводзіць школу ў беларускамоўны рэжым навучання?..

Ці будзе школа запатрабаваная?

Могуць узнікнуць праблемы і з колькасцю жадаючых вучыцца ў «белмоўных» класах. Ці будзе наогул у Віцебску запатрабаваная беларускамоўная школа? Дзмітрый Хома кажа, што некаторыя сумненні на гэты конт ёсць:

— Колькі жадаючых? Мы неяк падлічвалі, але вынікі нават агучваць не буду — гэта невялікая колькасць. На жаль, так. Але разумееце, адна рэч, калі толькі прапрацоўваеш ідэю, а другая — калі ўжо заўтра адчыняем школу. Дык вось калі людзі будуць дакладна ведаць, што заўтра адчыняем, то і жадаючых з’явіцца больш.

На думку начальніка ўпраўлення адукацыі, усё можа атрымацца, калі ўлада і грамадства будуць працаваць у гэтым накірунку супольна.

— Цалкам згодны, што справа важная. І калі будзем працаваць усе разам, то думаю, што зможам гэта зрабіць. Проста павінны сабрацца нейкай групай аднадумцаў у гэтым пытанні і дакладна распланаваць, хто чым будзе займацца. Зразумела, што ўлада возьме на сябе арганізацыйныя пытанні, а вось пытаннямі прапаганды (хоць гэта і непрыгожае слова), прасоўвання, рэкламы павінна заняцца грамадства, у тым ліку ТБМ. Без дапамогі людзей будзе нялёгка штосьці зрабіць, — падсумаваў Дзмітрый Хома.


КОММЕНТАРИИ (0)
Для того, чтобы оставить комментарий от своего имени, Вам нужно войти или зарегистрироваться.
Ваше имя *
Отправляя комментарий, Вы несете ответственность за соблюдение Правил сайта
Обновить